من أولها رفعت إديك
من أولها خسرت رهانك
من أولها الكون حوليك فاتك
وانت وقفت مكانك
للدرجادي كنت ضعيف
للدرجادي الـيأس مخيــف
ولا ده كله سحابة صـيف
ولا الحلم فـ قلبك خانـك
من أولها خسرت رهانك
إللي يشوفك قبل إمبارح
كان هيقــــول فارس مغوار
كان هيشوف الصقر الجارح
كان هيشوف معنى الإصرار
كان هيشوف الأمل الطارح
كان هيشوف الضلمة نهار
يجي يشوفك وانت مِطاطي
تايه فـ التيــار العــــاتي
تبكي بدمع اليأس ليلاتي
واقع من فوق دهر حصانك
من أولها خسرت رهانك
كلمة فـ سرك أنا مكسوفلك
أصل حقيقي شكلك بايخ
مش معقولة يكون موصوف لك
تبقى فـ عز شبابك شايخ
تمشي ورجلك مش شيلاك
تجري ويأسك يجري وراك
تقفل بابك والشباك
علشان أبقى صريح وياك
بكرة قلوب الناس تنساك
مش هتغيب الشمس عشانك
من أولها خسرت رهانك
بتقول قدرك بطل خيبة
عمر ما فشلك كان يوم عيبة
عيني فـ عينك بيني وبينك
إنت رضيت لليأس يهينك
إركب فرسك (( دري دري جن ))
إمسك جرسك وإنزل رن
إرفع سيفك وإقتل خوفك
حارب حتى ملوك الجٍن
أٌرفض ظُلمك وأُحضن حلمك
وإمسك قلمك وإبري السٍن
أصرخ عـ الأوراق بالفن
تسمع كل الدنيا آدانك
تبقى ساعتها كسبت رهانك
ليست هناك تعليقات:
إرسال تعليق