طيب عشان نوضح الأمر أكتر :
بنات
اليورو زي القمر وأنا باعترف وديه مش حاجة تضايقني كبنت بس اللي يضايقني
لما الاقي الهوم باج عندي كلها ولاد عاملين شير لصور البنات ديه وكاتبين
تعليقات بتعاير البنت المصرية أو الست المصرية لأ والأنيل بيوجهولهم شبه
اتهام على إزاي هم مش كده, فياعزيزي الشاب المصري اسمحلي اديلك فوق دماغك
وافوقك بـكلمتين يمكن متكونش واخد بالك منهم ومش هاتكلم بقى إن احنا بنتفوق
عليهم اخلاقيا أو دينيا لأ أنا هاتكلم من منطلق مش هيفهمه غير لامؤاخذة
يعني الراجل واقصد بالراجل اللي هيقف ويواجه نفسه إن ديه الحقيقة وإن ده
فعلا الوضع عاوز تحط البنت المصرية فى مقارنة أهلا بيك قوي بقى بس نقارن في
كله
1-بنات
اليورو مش عايشين في مجتمع شايف المحجبة أكيد وحشة ومعندهاش عقل واللي مش
محجبة أكيد قليلة الادب وسطحية والمنقبة أكيد أكيد وحشة أو حلوة على حسب بس
الاكيد إن معندهاش شخصية ولا عقل
2- بنات اليورو مش عايشين في مجتمع بيبص للبنت نظرة لامواخذة زبالة لو ماتجوزتش وهي عندها 30 سنة
3- بنات اليورو مش عايشين في مجتمع بيتعرضوا فيه يوميا للتحرش في الشارع ومش بيلاقوا دكر يدافع عنهم أو يجيب حقهم
4- بنات اليورو لما بيحصلهم اي حاجة في الشارع محدش بييجي يقولهم أصله إنتو كنتوا لابسين عريان وديه غلطتكو
5- بنات اليورو مجتمعهم مش ملخصهم في جسمهم وشكلهم بالعكس بيتبصلهم على انهم كيان مستقل بـذاته
6- بنات اليورو مش عايشين في مجتمع بيربي البنت على إن ضل راجل ولا ضل حيطة
7-
بنات اليورو مش عايشين في مجتمع شايف إن البنت اللي مهتمية بنفسها ومش
مرتبطة تبقى أكيد بتعمل حاجة غلط وبتدور على لفت الإنتباه ولو مرتبطة هي
ماشية مع قفص جوافة ولا هو اللي معاها مش مالي عينها فبتلفت نظر غيره !!!
8-
بنات اليورو مش بيتبصلهم بصة استهزاء لما واحدة فيهم تقول أنا عاوزة يبقى
ليا الحياه العملية الخاصة بيا ولا بيتبصلهم على انهم مجانين ولازم
يتعالجوا لو قالوا آه أنا مش مهم عندي الجواز
9- بنات اليورو لما بيبقى عندهم مشكلة في انهم يبقى عندهم ولاد ..مجتمعهم مبيتهمهش بنظرة انت واحدة ناقصة
10-بنات
اليورو لما بييجو يقدموا على شغل مبيتقالهمش احنا اسفين مابنشغلش بنات
عشان فى الغالب بياخدوا أجازة لما بيخلفوا مع إن ده نفس المجتمع اللي شايف
إنها لازم تخلف وإن ده دورها
11-
بنات اليورو بيهتموا بنفسهم عشان نفسهم ومحدش يقدر يقولهم 1/3 التلاتة كام
...لكن احنا عندنا لازم يكون فيه 1000 مبرر ومبرر غير نفسها ويا ريت ده
كمان مايبقاش موجود
12-
بنات اليورو لما بيتجوزوا اجوازهم بينادوهم بـاسمهم عادي قصاد اي كائن حي
عشان شايفينهم بني آدمين مش كأنهم جرثومة أو ميكروب أو عفريت يستحسن
ميتقالش اسمهم ويفضل تناديها بـاسم جوزها أو تقول حرمة أو المدام من غير
الاسم ويبقى نهار اللي جابوه طين لو واحد سأل على اسمها !
13-
بنات اليورو مش عايشين في مجتمع كل اللي حفظه من الدين : الشرع قال 4
والرجال قوامون على النساء وناسي حديث الرسول " رفقا بالقوارير " و" إنما
النساء شقائق الرجال ما أكرمهن إلا كريم وما أهانهن إلا لئيم "
14- بنات اليورو مش عايشين في مجتمع لسة بيبص على خلفة البنت على إنها مجايب عار فوق دماغه
15- بنات اليورو مش عيشين في مجتمع مختصر عفة البنت في ختانها وتغطيتها لجسمها
16- بنات اليورو مش عيشين في مجتمع أهم حاجة عنده إنه ليلة جواز البنت يمشي بـمنديل عليه دم فى الحتة عشان يثبت شرفها !!!!
17-
ودي أنا هاقولها من باب الحق آه احنا بنبص على كريم و مهند ونقعد نهرج
ونتريق بس اتحداك تلاقي أكتر من 10% بيتكلم على الشكل لأن l90% بيتكلموا
إزاي بيعاملوا البنت بـطريقة محترمة تحسسها إنها بنت قصاد الناس كلها مش
بيعاملوها على إنها حاجة يتكسفوا منها .. إن هم بيبينو مكانتها عندهم قصاد
الناس ودي حاجة لو لقيت 10% من الرجالة في مصر بيعملوها نبقى وصلنا
للعالمية
18- قبل ماتفكر
كده إنك تقول الست أو البنت المصرية مش زي بنات اليورو يا ريت تروح تبوس
إيد أمك لانك السبب في إن ده بقى شكلها الحالي وتحترم كل بنت مصرية على
إنها متحملة كل اللي فوق ده وساكتة ولسة هاتدبهديل زي الحاجة لما تتجوز
وتخلف!!
ليست هناك تعليقات:
إرسال تعليق